Pilion ta an mga matinud-anon, maabtik, sanan jaoy prinsipyo na modumaya sa 2022

Samtang an nasud Pilipinas nangandam sa moabutay na nasudnong piniliay 2022, an Konseho nan Unibersidad sa Unibersidad nan Pilipinas Diliman nanawagan  sa ato mga Pilipinong botante na dili kon an ato ra katungod sa pagbotar an ato himoon, lakip na isab an kritikal na pagsusi sa mga kandidato na ila pilion na amoy magdumaya sa taas na posisyon nan panggoberno.

Suyod sa pipila ka mga tuig an nilabay sukad adton noagi na eleksyon, nakita na nagkanat an mga sajop na impormasyon, bakak na balita (fake news), pagtuis sa matuod na istorya sanan pagtago sa tinuod na panhitabo – jaon tanan tagtudjo para utrohon an opinyon nan publiko dakan  mahatagan nan higayon na magkahiusa an gahom nan pipila ka dagko na politiko. An Unibersidad nan Pilipinas jaon ra nagbarog basi sa ebidensya sanan kritikal na pagkilaya kon unoy kamatuoran. Ini  gajod ang tagkinahanglan bahin sa mando nan Unibersidad nan Pilipinas na mapalambo an ato nasud pinaagi sa pagpanudlo sanan pag-imbestiga. Jaon an hinungdan kon uno kami nusaway sa pagguba sa tinuod na istorya (kasaysayan) dakan makakuha o makahakot nan mahamok na boto.

Nagkahiusa kami iban an mga magtutudlo, siyentista, artista, sanan an mga mananaliksik na waya mobati nan kaludja sa pagpaambit nan ila nahibay-an sanan kaabtik para batukan an hiniusa na pag-ataki sa kamatuoran. Nanawagan kami sa tanang Pilipinong botante na pilia gajod nijo jaon lider na masaligan sanan andam moalagad para lig-onon an kahimtang nan edukasyon sa ato nasud, makiglambigit sa komunidad nan mga akademiko dakan mahatagan an mga estudyante nan igong hinagiban, sakto na kakuhaan nan tinood na impormasyon para mabatukan an sajop na kabag-uhan. Ato pilion an mga kandidato na prayuridad an sektor nan edukasyon na dugay na nag-antos tungod sa kakuyang nan pagtagad nan hingtungdan na ahensya sanan labaw sa tanan motrabaho para madugangan an budget sa sector nan edukasyon.

Nanawagan kami sa mga botante na pilion gajod an mga kandidatong may integridad sanan lempyo an rekord sa panerbisyo, adjaw suportahe an mga kandidato na jaoy record na pangawkaw, pagpangilad, pag-abuso sa mga tawhanong katungod (karapatang pantao), pagdumili sa pagbayad nan buhis. Naghangjo isab kami sa mga katawhan na supakon ta an pagpamalit nan mga boto, pagpangilad, pagpanhadlok, paghimo nan kagubot ug iban pa. Kinahanglan na mahibayo kita molikay sa mga dinastiyang politiko, ugsa sakto na ibotar ta ang mga lider na kaya gajud motindog sanan mokontra sa gamhanang pamilya o grupo nan politiko sanan iban pa na ginsakopan.

Pilion nato an mga kadidato na tinood muserbisyo, jaoy prinsipyo sanan lig-on na baruganan, motuman sa ija tagsaad na plataporma na mutabang gajod sa mga naglisod. Pilion nato sila na molaban sa tinood na reporma sa lupa, paghunong sa kontraktwalisasyon para waya nay mawad-an nan trabaho,  sanan pakusgan an serbisyo sa ato maradjaw na panlawas, sa kagawasan sa mga impormasyon, pagpreserba  sa lupa nan mga IPs sanan  sa ato kinaijahan. Sabton nato pagdajaw kon sin-o sa ila an matinud-anon mualagad sa tanan labi na adton mga igsoon ta na jaon sa pinakanaglisod na sector.

Taghagit namo an mga kandidato na ila gajod madepensahan an akademikong Kalayaan sanan akademikong institusyon tungod sa mga panhadlok sa nagdumaya nan ato nasud lakip na an tanang porma nan kagubot sa mga katawhan sama sa red-tagging. Pinakasentro sa amo paningkamot an mapanalipdan an akademikong kalayaan kay kon mawaya jaon mawaya isab an espasyong kritikal diin did-on naggikan an tinood na tawhanong kasulbaran sa halayum na problema nan ato katilingban.

Sa umaabot na Mayo 9, 2022, ato ipakita an ato katungod sanan kagawasan na makapili nan tinood na moalagad sanan matinud-anon na modumaya (lider).

Isinalin sa Surigaonon ni Gemma Roxas-Escultor (taal na Surigaonon) sa pamamagitan ng UP Diliman (UPD) Sentro ng Wikang Filipino.

Ang UPD University Council ay pinamumunuan ni Chancellor Fidel R. Nemenzo at binubuo ng mga propesor, kawaksing propersor, at katuwang na propesor.